სერბეთის პრეზიდენტი იუწყება პატრიარქის ირინეოსის გარდაცვალების შესახებ
საუკუნოდ განისვენა სერბეთის მართლმადიდებელი ეკლესიის წინამძღვარმა.
გარდაიცვალა სერბეთის მართლმადიდებელი ეკლესიის პატრიარქი ირინეოსი, იუწყება თავის Instagram-ში სერბეთის პრეზიდენტი ალექსანდრე ვუჩიჩი.
„ჩემთვის პატივი იყო თქვენი გაცნობა. თქვენნაირი ადამიანები არასდროს არ მიდიან“, - მიაწერა ვუჩიჩმა პატრიარქის ფოტოსურათს დილის 8:25.
სერბეთის მართლმადიდებელი ეკლესიის წინამძღვარი იყო 90 წლის.
მომავალი პატრიარქი დაიბადა 1930 წლის 28 აგვისტოს სოფელ ვიდოვში ქალაქ ჩაჩაკთან ახლოს. მოინათლა მიროსლავის სახელით. დაწყებითი განათლება მან მშობლიურ სოფელში მიიღო, შემდეგ სწავლობდა ჩაჩაკის გიმნაზიაში. გიმნაზიის დამთავრების შემდეგ დაამთავრა სასულიერო სემინარია პრიზრენში, შემდგომში კი - ბელგრადის უნივერსიტეტის ღვთისმეტყველების ფაკულტეტი.
უნივერსიტეტის დამთავრების შემდეგ ის მსახურობდა ჯარში. ჯარის შემდეგ, 1959 წლის ოქტომბერში, ბერად იქნა აღკვეცილი სერბეთის უწმინდესი პატრიარქის გერმანეს მიერ მონასტერ რაკოვიცაში, მალე გახდა იერომონაზონი. ასწავლიდა პრიზრენის სემინარიაში.
შემდეგ მან გააგრძელა სწავლა ასპირანტურაში ათენის უნივერსიტეტის ღვთისმეტყველების ფაკულტეტზე. 1969 წელს დაინიშნა ოსტროჟის მონასტრის სამონაზვნე სკოლის გამგედ. მალევე დაიკავა პრიზრენის სემინარიის რექტორის თანამდებობა.
1974 წელს ირინეოსი აირჩიეს მორავიჩის ეპისკოპოსად, სერბეთის პატრიარქის ქორ-ეპისკოპოსად.
2010 წლის 22 იანვარს კენჭისყრის გზით, სერბეთის ეკლესიის სამ ყველაზე ღირსეულ მღვდელმთავართა შორის, ეპისკოპოსი ირინეოსი აირჩიეს პატრიარქად.
როგორც იუწყება სმე, 4 ნოემბერს პატრიარქი ირინეოსი დაავადდა კორონავირუსით და იმყოფებოდა სამხედრო-სამედიცინო აკადემიაში ბელგრადში. 19 ნოემბერს სერბეთის მართლმადიდებელი ეკლესიის წინამძღვრის მდგომარეობა გაუარესდა და ექიმებმა მიუერთეს მას აპარატები სასიცოცხლო მნიშვნელობის ორგანოების მუშაობის შესანარჩუნებლად.
