რუმინეთის ეკლესია საპატრიარქოს ასწლეულს აღნიშნავს

2025 წლის 4 თებერვალს რუმინეთის პატრიარქმა დანიელმა წმიდა სინოდის წევრებთან, ცენტრალური საეკლესიო ინსტიტუტების წარმომადგენლებთან და ასობით მორწმუნესთან ერთად მონაწილეობა მიიღო რუმინეთის საპატრიარქოს დაარსებიდან 100 წლის იუბილესთან დაკავშირებით საზეიმო ღვთისმსახურებაში, იუწყება რუმინეთის ეკლესიის ვებგვერდი.

საღმრთო ლიტურგიაზე პატრიარქმა დანიელმა გამოიყენა ეპისკოპოსის კვერთხი, რომელიც პატრიარქმა მირონმა (კრისტიამ) საჩუქრად მიიღო მეფე ფერდინანდისგან 1925 წელს გამეფებისას.

ლიტურგიის დასასრულს ახალი თანამედროვე წმინდანების საზეიმო გამოცხადება შედგა. წაიკითხეს სინოდალური ტომოსი, ხატები გამოაბრძანეს და ტროპარი უგალობეს მე-20 საუკუნის 16 რუმინელ წმინდანსა და აღმსარებელს.

თავის სადღესასწაულო სიტყვაში პატრიარქმა დანიელმა ხაზგასმით აღნიშნა, რომ მისი არსებობის 100 წლის განმავლობაში „რუმინეთის საპატრიარქო იყო წინამძღოლი შუქი ქრისტესთვის, ასევე ერთიანობისა და სტაბილურობის ფაქტორი რთულ დროს“.

მან აღნიშნა, რომ რუმინეთის საპატრიარქოს დაარსების ასი წლისთავი არის „ჩვენი ეკლესიის ისტორიის უფრო ღრმა გააზრების შემთხვევა, რომელიც მჭიდროდ არის დაკავშირებული რუმინელი ხალხის ისტორიასა და ცხოვრებასთან და მათ მისწრაფებასთან ერთიანობისა და თავისუფლებისაკენ“.

ახალ წმინდანებზე საუბრისას პატრიარქმა ხაზგასმით აღნიშნა, რომ ისინი წარმოადგენენ „ყველაზე ძვირფას ნაყოფს, რაც ჩვენს ეკლესიას ამ 100 წლის მანძილზე გამოჰქონდა, რადგან მათი მეშვეობით ყველაზე ნათლად ვლინდება სულიწმიდის მადლის საიდუმლო მოქმედება რუმინეთის მართლმადიდებლურ ეკლესიაში“.

შემდეგ დასავლეთ და სამხრეთ ევროპის მიტროპოლიტმა იოსებმა საპატრიარქოს ასი წლისთავთან დაკავშირებით სამადლობელი წირვა აღასრულა.

ზეიმი გაგრძელდება წმინდა სინოდისა და ეროვნული საეკლესიო კრების საზეიმო სხდომით, სადაც წარმოდგენილი იქნება ბოლო 100 წლის განმავლობაში რუმინეთის მართლმადიდებელი ეკლესიის ცხოვრების მთავარი მომენტები და მიღწევები.

2025 წელს რუმინეთის მართლმადიდებლური ეკლესია აღნიშნავს საპატრიარქოს რანგში ამაღლების 100 და ავტოკეფალიის 140 წლისთავს. ამ წლისთავისადმი მიძღვნილ ღონისძიებებს შორისაა ეროვნული საკათედრო ტაძრის კურთხევა, რომელიც 26 ოქტომბერს გაიმართება.

მანამდე მჟკ წერდა, რომ საპატრიარქოს ასი წლისთავი რუმინეთში 2025 წელს აღინიშნება.