რუმინეთის პატრიარქმა ალბანეთის არქიეპისკოპოსს ინტრონიზაცია მიულოცა
პატრიარქმა დანიელმა მილოცვის მიმართვა გადასცა რუმინეთის იერარქის საშუალებით, რომელიც ინტრონიზაციის ცერემონიას ესწრებოდა.
რუმინეთის მართლმადიდებელი ეკლესიის პატრიარქმა მილოცვის მიმართვა გადასცა ტირანის, დურესის და სრულიად ალბანეთის ახლადარჩეულ არქიეპისკოპოს იოანეს (პელუშა) ინტრონიზაციასთან დაკავშირებით, იუწყება basilica.ro.
რუმინეთის ეკლესიის პატრიარქმა აღნიშნა, რომ ახალი არქიეპისკოპოსი იოანე მოწოდებულია „ალბანეთის მართლმადიდებელი ეკლესიის მაღალი მსახურებისთვის როგორც წინამძღოლი, წმინდა მისიით, რომ გააგრძელოს და ერთგულად განავითაროს ღირსი არქიეპისკოპოს ანასტასის სულიერი მემკვიდრეობა“.
„სრულიად დარწმუნებულები ვართ, რომ თქვენი უნეტარესობა დიდი სამოძღვრო პასუხისმგებლობით და მისიონერული დინამიზმით შეასრულებს იმ ახალ მსახურებას, რომელიც თქვენ გერგოთ, შეიტანთ ღვაწლს ჩვენი უფლის იესო ქრისტეს სახარების ქადაგებაში სულ უფრო სეკულარიზებულ სამყაროში, რომელიც უამრავი კრიზისით გამოირჩევა“, - აღნიშნა პატრიარქმა დანიელმა.
უნეტარესმა მეუფემ გამოხატა „სრული მზადყოფნა მჭიდრო თანამშრომლობისთვის ჩვენს დაძმობილებულ ეკლესიებს შორის“.
„მხოლოდ ასე შევძლებთ ერთად შევიტანოთ ჭეშმარიტად ქრისტიანული მოძღვრება ევროპასა და მთელ მსოფლიოში“, - დაამატა მან.
რუმინეთის ეკლესიის პატრიარქმა მილოცვის მიმართვა გადასცა მუნტენსკის მიტროპოლიის ტირგოვიშტსკის საპატიო მიტროპოლიტის საშუალებით, რომელიც ესწრებოდა ინტრონიზაციის ცერემონიას.
„რუმინეთის მართლმადიდებელი ეკლესიის წმინდა სინოდის, სამღვდელოებისა და მორწმუნეთა სახელით გილოცავთ ამ კურთხეულ მოვლენას. ამავდროულად, გისურვებთ თქვენს უნეტარესობას უამრავ ნაყოფიერ წელს ალბანეთის წმინდა მართლმადიდებელი ეკლესიის სამსახურში“, - დაასრულა რუმინეთის მართლმადიდებელი ეკლესიის პატრიარქმა.
როგორც მჟკ წერდა, 2025 წ. 29 მარტს შედგა ალბანეთის ეკლესიის ახალი წინამძღოლის ინტრონიზაცია.
